चीनद्वारा बुद्धिजमका लागि ५ अर्ब
 |
पुस ९, २०७२- चीनले बुद्धिजम पूर्वाधारमा ५ अर्ब रुपैयाँ बराबरको सहयोग उपलब्ध गराउने भएको छ ।
यस विषयमा बिहीबार संस्कृति, पर्यटन तथा नागरिक उड्डयन मन्त्रालय र चीन सरकारबीच सम्झौता भएको छ । सम्झौताअनुसार चीनको 'सिचुआन वेनचेन अर्थक्वक रिकन्स्ट्रक्सन फाउन्डेसन' ले काभ्रेको उग्रचण्डी नाला गाविसको तनचोक डाँडामा अन्तर्राष्ट्रिय बौद्ध सांस्कृतिक केन्द्र निर्माण गरिने छ । सँगै काठमाडौंको चन्द्रगिरि पहाडमा गौतम बुद्धको आकृति (आइकन) निर्माण गरिने छ । दुई पक्षीय सम्झौतामा चीनतर्फबाट फाउन्डेसनका उपाध्यक्ष याङ टेङलोङ र पर्यटनमन्त्री आनन्दप्रसाद पोखरेलले हस्ताक्षर गरेका थिए । मन्त्रालयका सचिव दिनेशकुमार थपलियाका अनुसार सहमति भएको पहिलो ६ महिनाभित्र प्रारम्भिक सर्वेक्षण र दोस्रो ६ महिनामा विस्तृत अध्ययन प्रतिवेदन बनाइने छ । 'तीन चरणको छलफलपछि हामीले बिहीबार सम्झौता गरेका छौं, एक वर्षभित्रै अध्ययन सकेर निमार्ण सुरु भइसक्ने छ,' सम्झौता कार्यक्रममा सहभागी सचिव थपलियाले भने । दुई पक्षीय सम्झौताअघि चिनियाँ र नेपाली टोलीले काभ्रेको उग्रचण्डी नाला गाविसको तनचोक डाँडाको स्थलगत अवलोकन गरेको थियो ।
काठमाडौं कोटेश्वरदेखि २५ किलोमिटर दूरीमा पर्ने तनचोकमा पुरानो गुम्बा छ । त्यहाँबाट उपत्यकालगायत उत्तरतिरका हिमालहरू प्रस्टै देखिन्छन् । सबैतिर देखिने त्यो डाँडो काठमाडौंबाट नजिकै र उच्च स्थानमा पनि पर्ने मध्येको भएकाले छानिएको मन्त्रालयले जनाएको छ । ३ सय ७६ रोपनी क्षेत्रफलको सार्वजनिक जग्गामा निर्माण हुने सांस्कृतिक केन्द्रले गौतम बुद्धको ८० वर्षे जीवनकालबारे विस्तृत जानकारी र उनको समाधिपछि फैलिएको बुद्ध दर्शनबारे विस्तृत जानकारी राख्ने छ । हाल बुद्धधर्मबारे जानकारी लिन नेपाल आउने पर्यटकहरूको बसाइ लम्याउन यसले मद्दत गर्ने पर्यटन मन्त्रालयको विश्वास छ । 'विश्वभर छरिएका बुद्ध धर्मालम्बी र अनुयायीहरूलाई आकर्षण गर्ने अन्तर्राष्ट्रिय स्तरकै ध्यान केन्द्र पनि निर्माण हुने छ । यो परियोजनाले नेपालमा गौतम बुद्धबारे जानकारी लिन आउने पर्यटकहरूको बसाइ लम्याउन मद्दत मिल्ने अपेक्षा गरेका छौं,' सचिव थपलियाले भने । चीनले रकम नपुगे थप्ने बाचा पनि गरेको यो परियोजनाले बुद्ध सर्किटमा पर्ने लुम्बिनी, पोखराको शान्ति स्तुपालाई पनि जोड्ने छ । यसैगरी यसै परियोजनाबाट चन्द्रागिरि पहाडको चट्टानी भागमा बुद्धको आइकन पनि बनाइने छ ।
भित्तामा बनाइने यस्तो आइकन नेपालमा हालसम्म कतै पनि निर्माण भएको छैन । भित्तामा बनाइने बुद्ध आकृति राजधानीका सबै स्थानबाट देखिने छ । अहिले निर्माण भइरहेको केबलकार परियोजनामा पर्यटकीय गतिविधि बढाउन पनि यसले मद्दत गर्ने छ । यो परियोजनाको निर्माणमा नेपाल सरकारको लगानी नरहे पनि सहसचिवको संयोजकत्वमा सञ्चालक समिति रहने छ । यसले योजना आयोग, अर्थ मन्त्रालय र दातृ निकाय चीनसँग समन्वय गर्ने छ ।
0 comments
प्रतिक्रिया दिनुहोस्...